Para Sa Aking Ama at Ina

Laking pasalamat ko sa Diyos sa biyayang Kanyang binigay

Isang ama at ina na sa aming apat na magkakapatid ay umalalay

Mula pagkabata, laking sakripisyo ang kanilang ginawa

Para mabigyan kami ng buhay na maayos at puno ng ginhawa

 Pinag-aral kami sa magandang eskuwelahan

Para matutunan ang mga iba’t-ibang mabuting asal at kaalaman

Na sa ami’y magagamit sa aming paglaki

At ito lamang ang kayaman na maibibigay nila na di mabibili

Ngayon kami’y mga nasa tamang edad na

At ang iba ay may sarili ng pamilya

Kanya-kanya na kaming may mga napiling buhay

Ganon talaga, darating din ang panahon na kami’y magkakahiwalay

Sa kabila ng lahat, ang aming mga magulang ay mga napanatag

Dahil sa kaming magkakapatid ay mga nagiging matatag

Sa kabila ng mga problema at hamon ng buhay

Kami’y di nawalan ng pag-asa at naging malumanay

Turo ng aming mga magulang, magtiwala lang sa Diyos

At ang lahat ng bagay ay magiging maayos

Ngayon ay matatanda na ang aking ama at ina

Salamat sa Panginoon sa binigay na mga biyaya sa kanila

Bigyan pa sana sila ng mahabang buhay

At maging masaya ang kanilang pagsasama at puno ng kulay

Maraming salamat, aking ama at ina

Dahil sa inyong pagmamahal, pag-unawa at pagkalinga

Pinapangako ko na sa inyong pagtanda

Ay lagi akong nandiyan at alalay sa inyong dalawa

Huwag mangamba at di kayo namin pababayaan

Kahit anong mangyari, palagi namin kayong aalagaan

Salamat sa Panginoon sa binigay na magandang biyaya

Isang ulirang ama at ina